Чин како подобает приимати приходящих от жидов к Правей Христианстей вере

Чин како подобает приимати приходящих от жидов к Правей Христианстей вере

Творение Святителя Амвросия, Епископа Медиоланского

Текст в формате     doc      pdf

Лик же поет псалом 3.3:
    Благословлю Господа на всякое время, выну хвала Его во устех моих. О Господе похвалится душа моя, да услышат кротцыи, и возвеселятся. Возвеличите Господа со мною, и вознесем имя Его вкупе. Взысках Господа, и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится Ангел Господень окрест боящихся Его и избавит их. Вкусите и видите, яко благ Господь; блажен муж, иже уповает Нань. Бойтеся Господа, вси Святии Его, яко несть лишения боящымся Его. Богатии обнищаша и взалкаша, взыскающии же Господа не лишатся всякаго блага. Приидите, чада, послушайте мене, страху Господню научу вас. Кто есть человек хотяй живот, любяй дни видети благи? Удержи язык твой от зла, и устне твои еже не глаголати льсти. Уклонися от зла и сотвори благо, взыщи мира и пожени и. Очи Господни на праведныя, и уши Его в молитву их. Лице же Господне на творящыя злая, еже потреби от земли память их. Воззваша праведнии, и Господь услыша их, и от всех скорбей их избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавитя Господь. Хранит Господь вся кости их, ни едина от них сокрушится. Смерть грешников люта, и ненавидящии праведнаго прегрешат: Избавит Господь души раб своих, и не прегрешат вси упавающии на Него.
    Став же у дверей внутрь храма, вопрошает оглашаемого:
Вопрошение: Кто еси;
Ответ: Аз есмь, истиннаго Бога познати желаяй и спасения иский.
Вопрошение: Что пришел еси ко Святей Церкви;
Ответ: Научитеся от нея истинней вере и к ней присоединитися.
Вопрошение: Кую пользу получити надеешися от истинныя веры;
Ответ: Жизнь вечную и блаженную.
Оглашаемый же творит отрицание, и по отрицании исповедует веру истинную.
Отречение же есть таково:
    1. Отрицаюся всех жидовских обычай, и начинаний, и законных, и опресноков, и жертвы агнца, и труб, и потщения кущ, и прочих всех праздник жидовских, и жертв, и молитв, и кроплений, и очищений, и чистительств, и оцещений, и пощений, и новомесячных, и суббот, и волхований, и обаяний, и обязаний, и хранилищ, и соборищ, ядений, и пития иудейскаго, и протсо отрицаюся всякия иудейския вещи, и закона, и обычая, и начинания.
    2. И над всеми отрицаюся в образе христа чаемого от иудей антихриста, сочетаваюся истинному Христу и Богу.
    3. И верую, во единаго Бога Отца… (читается Символ Веры)
    4. И тако верую во Отца и Сына и Святаго Духа, Святую и Единосущную и Нераздельную Троицу. И плотское смотрение и к человеком пришествие того самого Слова Божия, Святыя Троицы Единаго, исповедую. И поистинне человека того быти верую, не отступльша Своего Божества.
    5. И плотию Того родшую Святую Деву Марию праведною и воистинну Богородицу сущую верую и глаголю.
    6. И честный Крест Христов и Святые иконы и приемлю, и чту, и поклоняюся, и целую.
    7. И тако от всея души и сердца и веры истинныя прихожду к Христианстей вере. Аще ли с лицемерием или с лестию сия рекох, а не от веры все душевныя и сердца, Христа любяща, но ныне убо воображаюся быти Христианин, последи же восхощу отврещися и к иудейстей возвратитися паки вере, или отбрящуся ядый с иудеи и спразднуя, или беседуя с ними отай и Христианство обличаю, а не паче яве облычая их и отметаю суетную веру их, ныне убо да приидет на мя трепет Каинов и прокажение Гиезиино, яко и казнем градских закон быти ми повинну, в будущем же веце да буду клят и проклят, и душа моя учинена да будет с сатаною и бесы. Аминь.
    Таже предстоятель глаголет к нему:
Преклони колена твоя пред Господем Богом нашим.
    Он же, колена преклонь и руце крестообразно на персех сложены имея, пред дверми стоит.
Предстоятель, знаменая главу его трижды глаголет:
    Знаменается раб Божий (имя рек), во имя Отца, и Сына, и Святаго Духа. Аминь.
Диакон: Господу помолимся. Лик: Господи, помилуй.
Иерей, стоя над оглашаемым, чтет молитву сию:
    Благословен еси, Господи, от всех язык, призываяй люди избранны, ревнители добрых дел. Ты и ныне пришедшаго ко Святей Твоей Церкви раба Твоего (имя рек) благослови: отверзи его очи душевныя к разумению чудес Твоего о нас промышления, открый слух сердца его ко приятию Божественных словес Твоих, да во время благоприятно сподобится бани возрождения и одежди нетлениям. Ты изъял еси душу сего раба Твоего от прелести лукаваго: сам убо сохрани ю невредиму от навет вражиих, и обиталище благодати Твоея быти удостой. Твое бо есть, еже избавляти нас от козней лукаваго, и Тебе славу и благодарение приносим, ныне и во веки веков.
Лик: Аминь.
    По днех довольнаго научения, по вечерни, предстоятель облачится во священную одежду, якоже предречеся, и поклонився трижды пред Престолом и целовав край его, исходит от Олтаря к дверем церковным.
Поется же псалом 8:
    Господи, Господь наш, яко чудно имя Твое по всей земли, яко взятся великолепие Твое превыше небес. Из уст младенец и ссущих совершил еси хвалу, враг Твоих ради, еже разрушити врага и местника. Яко узрю небеса, дела перст Твоих, луну и звезды, яже Ты основал еси. Что есть человек, яко помниши его? Или сын человечь, яко посещаеши его? Умалил еси его малым чим от Ангел, славою и честию венчал еси его. И поставил еси его над делы руку Твоею, вся покорил еси под нозе его. Овцы и волы вся, еще же и скоты польския. Птицы небесныя и рыбы морския, преходящыя стези морския. Господи, Господь наш, яко чудно имя Твое по всей земли.
И творим известнейшее отречение с проклятием.
Имать же сие тако:
    1. Аз (имя рек) от жидов днесь прихожду к вере Христианстей, ни коея же ради нужды, или беды, или страха, или искушения, или нищеты, или ради долга, или напасти на мя воздвизаемыя, или чести ради мирския, или добродеяния некоего, или богатства ради или имения, от некоего отбещаемых, или отинуд коего любо прибытка, или заступления ради человеческа, или зависти ради, или любопрения бывшаго к некоему от единоверник моих, или хотя отсюду враждовати на Христианы, яко ревнитель убо закона, или от них онеправдован быв.
    Но яко от всея души и от всего сердца Христа любя и Того веру, отрицаюся всякия жидовския службы, и обрезания, и законных всех, и опреснок, и пасхи, и жертвы агнца, и праздника седмиц, и оставления, и труб, и оцещения, и кущ потчения, и прочих всех праздник жидовских, и жертв, и молитв, и кроплений, и очищений, и чистительств, и пощений, и суббот, и новомесячных, и снедей, и пития их, и просто отрицаюся всякаго иудейскаго закона, и обычая, и начинания.
    2. И над сими проклинаю яже от иудей ереси и еретики:
Саддукеи, глаголемые праведники, иже Святый Дух хулят, и от мертвых воскресения отметаются, и Ангелы отлагают.
    Фарисеи отлученныя, иже в понедельник и в четверток постящеся, и девство на времена повеленная лицемерствующе, послежде разрушют всякое воздержание, славят же рождесловие и звездочетию прилежат.
    Назореи же разрушители, иже о жертвах не приимают Моисеова закона, и сего ради одушевленных огребаются, и отнюдь не жрут.
    Оссеяны же безстудныя, иже писания иная, кроме закона, приимше, и множайша от пророк отвергше, учителем хвалятся человеческим, Илксай нарицаемым, сиречь силою сокровенною, и Марфо и Мароану, от рода его исходящыя, якоже богини чтут.
    Иродианы же, иже инноплеменника, царя иудейска Ирода червоснедаемого, якоже Христа славят.
    Дневнокрестящыяся, иже таяжде мысляще с фарисеи, заповедают по приложению, еже не мощно человеку спастися, аще не крестится на всяк день.
    Книжники, сиречь законоучители, иже не хотяще по закону жити, но излише умножати его, гольки же и чаши и блюда и иныя сосуды умывати, и пястию руки омывати, и сосуды мыти умышляют, и просто многа предания к закону приложше, своя удвоения сия нарицают, якоже вторая Божия законоположения. И первое убо возносят лжуще на Моисея, второе же на равви Акивана, третие же на Аннана и на Иуду, четвертое же на Насамонеовы дети, иже и субботу в бранех отложиша.
    Сия убо проклинаю, иудейския вся ереси и ересеначальники, и удвоения и удвоители.
    3. Проклинаю с сими и творящыя праздник нарицаемаго Мардохея в первую субботу Христианских постов, и на древе убо Амана пригвождающыя к нему крестное знамение, и сожигающыя, в клятвы же всяки и в проклинания Христианы влагающия.
    4. Проклинаю и в начале индикта в праздник трубный обязующия роги червленицами различных вапь, по сем чары некия к сим прирекающыя, и на отгнание, яко мнят, трясавицы, и всякаго иного недуга приемлющыя.
    5. Проклинаю и в иулии месяце воспоминание празнующыя глаголемых от них скорбных, рекше пленения Иерусалима, прахом же главы посыпающыя, и постящеся пребывающыя во весь день и нощь. И с безчисленным плачем прилагающыя себе: горе.
    6. Еще проклинаю вся чающыя помазанникова, паче же антихристова, пришествия, егоже и трапезу им уготовати надеются велику, и поставити в снедь Зиза же и Махемофа и Левиафана. Быти же убо Зизу пернатому некоему животному, и Махемофа же четвероножну, Левиафану же водну, сице великим и тучным плотьми, яко довлети коемуждо в пищу тьмам безчисленным.
    7. И еще проклинаю всяк жидовский обычай и начинание, не преданное Моисеом, и всякое их волхование, и обаяние, и ворожение, и волшбу, и обязания, и хранилища.
    8. Еще проклинаю всякаго ревви или равви, паче Моисеова закона научивша или учаща, и вся глаголемыя архиферекиты их, или старейшины реввитския, или старейшины раввитския, или учители, ихже нечестивая учения отеческая нарицают.
    9. Проклинаю с древлими старейшинами раввитскими и новыя иудейския злыя учители, Лазаря реку, беззаконный праздник изобретша, глаголемаго от них единоножия, и Илию, того по нечестию не меньша, Вениамина же, и Зеведея, и Аврамия, и Сумватия, и прочия.
    10. И над всеми сими проклинаю и препроклинаю от иудей чаемаго, якоже христа, приити хотяща мессию, сиречь помазанника, паче же антихриста, и отрицаяся его, обещаваюся истинному и единому Христу Богу.
    11. И верую во Отца, и Сына, и Святаго Духа, Святую и Единосущную и Нераздельную Троицу. И плотское смотрение и к человеком пришествие исповедую от Святыя Троицы Единаго, Единародного Сына и Слова Божия, иже от Отца прежде всех век рожденна, имже вся быша. Того суща верую от закона и пророк проповеданного Мессию, егоже и уже пришедша на землю извещаю, спасения ради человеческаго рода, и бывша поистинне Человека, не отступльша Своего Божества, и суща того Бога воистинну, несмесно, непреложно и непременно, в составе единем и в дву естеству, волею же вся пострадавша и рапята плотию, Божеству безстрастну пребывшу, и погребена бывша, и в третий день воскресша, и на небеса вознесшася, и приити хотяща в славе судити живым и мертвым.
    12. И плотию Того рождшую, Святую Деву Марию, и пребывшую по Рождестве Девою, праведно и воистинну Богородицу верую и глаголю, и Яко поистинне Матерь Бога Вочеловечшагося, и сего ради Госпожу и Владычицу благодатию бывшую всея твари, покланяюся и чту.
    13. И от Христиан тайне освещаемому хлебу и вину, Егоже в Божественных службах приемлют, покараюся и исповедую и верую плоти и крови быти поистинне Господа Иисуса Христа, прелагаемым того Божественную силою, умне же и невидимо, паче всякаго естественна разума, яко весть Един Сам. И такои аз причащатися сим обещаваюся, яко поистинне сущу Телу и Крови Его, на освящение души и телу, и в живот вечный, и Царствия Небеснаго наследие, приемлимым сим в вере совершенней причащающимися.
    14. И Святаго Христова крещение с чистою и нелукавою душею и сердцем и с верою истинною ищу прияти, извествуя воистинну очищению сему умну быти и пакирождению души же и телу.
    15. И Честный Крест того истиннаго Христа и Бога нашего, яко нектому тления и клятвы оружие, но свободы и живота вечнаго, и знамение на смерть и на диаволы победы,
Еще же и честныя иконы, по плоти явления к человеком Божия Слова, и неизреченно того Рождшия Чистыя Девы и Божия Матере, и богообразных Ангел, и Святых всех, яко образы первобразных, и приемлю, и чту, и целую.
    16. И тыяже Святыя Ангелы и Святыя вся, не токмо праотцы и пророки, но и Апостолы, и мученики, и исповедники, и учители, и преподобныя, и вся просто угождшыя уже пришедшу Христу, яко рабы Того и верныя угодники, чту и почитаю, чести ради, яже к тому.
    17. И тако от всея души и сердца и изволения истиннаго прихожду к вере Хрисианстей. Аще ли с лицемерием и лестью сия рекох, а не от веры вседушевныя и сердца, уже пришедшаго Христа любяща, но некоея ради нужды, или беды, или страха, или искушения, или нищеты ради, или долга, или напасти на мя воздвизаемыя, или чести ради мирския, или добротворения ради некоего, или богатства ради или имения, от некоего обещаемых, или отинудь коего любо прибытка, или заступления ради человеческа, или зависти ради, или любопрения бывшаго к неким от единоверник моих, или хотя отсюду враждовати на Христианы, яко ревнитель убо закона, или от них онеправдован быв, ныне убо вображаюся быти Христианин, последи же восхощу отврещися и к иудейстей возвратитися паки вере, или обращуся ядый с иудеи. Или спразднуя, или спостяся, или беседуя с ними отай и Христианство облыгая. Или в соборища или на молитвы ходя их, и обновляя или претворяя сия, а не паче яве обличаю их и их деяния и отметаю суетную веру их. Ныне убо да приидут на мя вся клятвы, яже во Вторем законе Моисей написа, и трепет Каинов, и проказа Гиезиина, яко и казнем градских закон быти ми повинну неотложне, в будущем же веце да буду клять и проклять, и душа моя учинена да будет с сатаною и бесы. Аминь.

    Таже предстоятель глаголет: Аще воистинну тако есть, якоже рекл еси, утверди проклятие, отрицание и исповедание твое пред Церковию рукописанием.
    Он же пишет клятву сию и чтет:
    Аз, (имя рек), от жидовства ко Христианстей вере приходяй, днесь пред всевидящим Богом клятвою моею извествую, яко не по принуждению или страху, или чрез притеснение от единоверных ми, и не корысти ради, или иныя утаенныя мною вины, жидовскаго лжеверия и всех, яже во онем, ересей и злохулений отрицаюся, и ко спасительней Христианстей вере прихожду: но точию ради спасения души своея, быв самою истиною сея веры побежден, и любовию сердца моего ко Христу Спасителю влеком, Христианин быти хощу и крещения Святаго сподобитися желаю. Аще же сия с лицемерием ныне исповедую, а не от желания сердца моего ко Христу Богу прихожду, и послежде веры Христианския отврещися и паки в жидовство возвратитися дерзну, да постигнет мя гнев Божий и осуждение вечное. Аминь.
    Посем иерей речет: Благословен Бог, хотяй всем человеком спастися и в разум истины приити. Аминь.
Диакон: Оглашеннии, главы ваши Господеви приклоните.
Лик: Тебе, Господи.
Оному убо главу приклоньшу, диакону рекшу: Господу помолимся, и лику: Господи, помилуй, предстоятель чтет молитву сию:
    Боже великий, первобытную тьму просветивый и Сына Твоего низпославый во очищения падшего естества нашего, Сам и раба Твоего (имя рек), подклоньшаго Тебе главу свою, преведи от омрачения греховнаго к свету Твоего Богоразумия, очисти от скверны, изми от козней сопротивнаго, и сопричти его избранному Твоему стаду, даруя ему часть и жребий в Церкви Твоей Святей. Ты бо еси Бог наш, сый благословен во веки.
Лик: Аминь.
Таже знаменав оглашеннаго, и зря ко Олтарю диакону рекшу:
    Господу помолимся, и лику: Господи, помилуй, глаголет молитву сию:
    Боже великий и дивный, призываяй заблудших и рекий: обратитеся ко Мне, и обрящуся к вам, и обращающагося приемляй, по слову Твоему: грядущаго ко Мне не изжену вон, сам и раба Твоего сего (имя рек), приходящаго к Тебе от заблждения пути своего, приими, предъусрет его благодатию Твоею, введи его во двор Твой церковный: отверзи ему врата правды, в няже вшед, возможет избегати всякия прелести, лжи и неправды: Ангела ему посли, сопутствующа на добрем пути, на немже обрел есть Тебе, Спаса нашего Бога: укрепи веру его, надежду и любовь чистую, и яви лице Твое на нем, яко да сподобится бани пакибытия и одежди нетления, и тако во обновлении жизни ходити начнет. Твое бо есть еже миловати, просвещати и спасати нас, и Тебе славу возсылаем, Отцу и Сыну и Святому Духу, ныне же и во веки.
Лик: Аминь.
    Аще нецыи уже крещени по чину Православныя Церкве обретаются, узаконивают Святое крещение сим отречением, исповеданием и клятвою.